«Барселона» спорт директори Деку каталонияликлар ҳимоячи Андреас Кристенсенга янги шартнома таклиф қилишини тасдиқлади.
Клуб мутасаддисининг таъкидлашича, «Барселона» жароҳат олган футболчини қийин вазиятда қолдирмоқчи эмас. Кристенсен тизза пайларининг узилиши сабабли жорий мавсумда бошқа майдонга туша олмаслиги мумкин, шу сабабли клуб унга 2027 йилгача мўлжалланган (амалдаги шартномани яна бир йилга узайтирувчи) «адолатли таклиф» беришга қарор қилган.
«Биз футболчини мураккаб аҳволда қолдиришни истамаймиз, чунки у мавсум охиригача бошқа ўйнай олмаса керак деб ҳисоблаймиз. Шу боис, унга адолатли ва қабул қилиш мумкин бўлган вариант таклиф қилмоқчимиз. Шундан сўнг футболчи мустақил қарор қабул қилиши мумкин бўлади. У "Барселона"да қолишга мажбур эмас, лекин биз ҳеч бўлмаганда у кўриб чиқиши мумкин бўлган таклифни беришга ҳаракат қиламиз», — деди Деку матбуот анжуманида.
Андреас Кристенсен 2022 йилда «Челси»дан эркин агент сифатида «Барселона»га ўтган эди. Унинг амалдаги шартномаси 2026 йилнинг 30 июнига қадар белгиланган. Жорий мавсумда 29 ёшли даниялик ҳимоячи 17 та ўйинда қатнашиб, битта гол уришга улгурди.
