«Manchester Yunayted»ning sobiq himoyachisi Yap Stam «qizil iblislar»ning «Brayton» yarim himoyachisi Karlos Balebaga bo‘lgan qiziqishi haqidagi xabarlarga munosabat bildirdi.

«Menga Karlos Baleba juda yoqadi va o‘ylaymanki, u «Manchester Yunayted»da Kazemironing o‘rnini bosa oladi. Frenki de Yong ham menga juda maqbul nomzod, lekin u «Barselona»da qoladigan ko‘rinadi. «Manchester Yunayted»ga yaxshi jismoniy holat va chidamlilikka ega bo‘lgan o‘rinbosar kerak. Shuningdek, ular to‘p bilan yaxshi muomalada bo‘ladigan futbolchi qidirishlari lozim. Baleba buni ta’minlab berishga qodir», — dedi Stam «Metro» nashriga bergan intervyusida.

Joriy mavsumda 22 yoshli yarim himoyachi «chaykalar» safida barcha musobaqalarda 23 ta o‘yinda maydonga tushdi, biroq hozircha samarali harakatlarni amalga oshirmadi. «Transfermarkt» portali kamerunlik futbolchining bozor qiymatini 60 million yevroga baholamoqda, biroq «Brayton» uni 80-100 million funt sterling atrofida sotmoqchi.