Italiyalik murabbiy Roberto de Dzerbi yaqinda ishsiz qoldi. Mutaxassis «PSJ»dan qabul qilingan yirik mag‘lubiyatdan (0:5) ko‘p o‘tmay, «Marsel» bilan shartnomani o‘zaro kelishuvga ko‘ra bekor qildi.
46 yoshli murabbiy Tomas Frank iste’fosidan so‘ng bo‘shab qolgan «Tottenxem» boshqaruvi uchun asosiy nomzodlardan biriga aylandi, biroq «shporlar» boshqa nomzodlarni qidirishlariga to‘g‘ri kelishi mumkin. Jurnalist Maykl Bridjning ma’lumotiga ko‘ra, de Dzerbi darhol ishga qaytishni rejalashtirmayapti — u kamida mavsum yakuniga qadar tanaffus olmoqchi.
Roberto de Dzerbi 2024 yilning yozidan buyon «Marsel»ni boshqarib kelayotgan edi. Taxminlarga ko‘ra, mavsumlar oralig‘ida italiyalik mutaxassis Maykl Kerrik va Xosep Gvardiola ketadigan bo‘lsa, mos ravishda «Manchester Yunayted» va «Manchester Siti»dagi lavozimlarga da’vogarlik qilishi mumkin.
