Hozirda «Bavariya» bosh murabbiyi sifatida faoliyat yuritayotgan sobiq himoyachi Vensan Kompani futboldagi eng qadrli g‘alabasi haqida so‘zlab berdi.

Belgiyalik mutaxassis «Manchester Siti» bilan 2011/12 yilgi mavsumda Angliya Premyer-ligasida qo‘lga kiritgan ilk chempionligini alohida ta’kidlab o‘tdi.

«Mening eng sevimli sovrinim? «Manchester Siti» bilan ilk chempionlik. Biz uni so‘nggi turning so‘nggi soniyalarida, Serxio Aguero g‘alaba golini kiritgan lahzada qo‘lga kiritgandik. Bu mening barcha davrlardagi eng sevimli sovrinim, deb aytgan bo‘lardim», – dedi Kompani matbuot anjumanida.

Sobiq markaziy himoyachi «shaharliklar» safida 2008 yildan 2019 yilgacha to‘p surgan. 2024 yil yozidan buyon u «Bavariya»ni boshqarmoqda va jamoa bilan 2024/25 yilgi mavsumda Bundesliga chempionligini qo‘lga kiritdi.