Ҳозирда «Бавария» бош мураббийи сифатида фаолият юритаётган собиқ ҳимоячи Венсан Компани футболдаги энг қадрли ғалабаси ҳақида сўзлаб берди.
Бельгиялик мутахассис «Манчестер Сити» билан 2011/12 йилги мавсумда Англия Премьер-лигасида қўлга киритган илк чемпионлигини алоҳида таъкидлаб ўтди.
«Менинг энг севимли совриним? «Манчестер Сити» билан илк чемпионлик. Биз уни сўнгги турнинг сўнгги сонияларида, Серхио Агуэро ғалаба голини киритган лаҳзада қўлга киритгандик. Бу менинг барча даврлардаги энг севимли совриним, деб айтган бўлардим», – деди Компани матбуот анжуманида.
Собиқ марказий ҳимоячи «шаҳарликлар» сафида 2008 йилдан 2019 йилгача тўп сурган. 2024 йил ёзидан буён у «Бавария»ни бошқармоқда ва жамоа билан 2024/25 йилги мавсумда Бундеслига чемпионлигини қўлга киритди.
