"Roma" himoyachisi Zeki Chelikning agenti Fazil O‘zdemir futbolchining A Seriyaning boshqa klubiga o‘tishi mumkinligi haqidagi xabarlarga munosabat bildirdi.
Avvalroq OAVda futbolchining "Yuventus" bilan kelishuvga erishgani haqida ma’lumotlar tarqalgan edi. Shuningdek, 29 yoshli turkiyalik himoyachiga "Inter" ham qiziqish bildirmoqda.
"Bularning barchasi shunchaki mish-mish. Hozirgi vaqtda Chelik katta jamoada o‘ynayapti, shu sababli Angliya va Italiyaning boshqa klublari unga qiziqish bildirayotgani ajablanarli emas. Uning "Roma" bilan shartnomasi mavsum oxirida yakuniga yetadi, biroq u klubni hurmat qiladi va bor e’tiborini mavsumning qolgan qismiga qaratgan", — deya agentning so‘zlarini keltiradi "FcInterNews".
Joriy mavsumda Chelik barcha musobaqalarda 31 ta o‘yinda maydonga tushib, bitta gol urdi va to‘rtta golli uzatmani amalga oshirdi.
