"Рома" ҳимоячиси Зеки Челикнинг агенти Фазил Ўздемир футболчининг А Сериянинг бошқа клубига ўтиши мумкинлиги ҳақидаги хабарларга муносабат билдирди.
Аввалроқ ОАВда футболчининг "Ювентус" билан келишувга эришгани ҳақида маълумотлар тарқалган эди. Шунингдек, 29 ёшли туркиялик ҳимоячига "Интер" ҳам қизиқиш билдирмоқда.
"Буларнинг барчаси шунчаки миш-миш. Ҳозирги вақтда Челик катта жамоада ўйнаяпти, шу сабабли Англия ва Италиянинг бошқа клублари унга қизиқиш билдираётгани ажабланарли эмас. Унинг "Рома" билан шартномаси мавсум охирида якунига етади, бироқ у клубни ҳурмат қилади ва бор эътиборини мавсумнинг қолган қисмига қаратган", — дея агентнинг сўзларини келтиради "FcInterNews".
Жорий мавсумда Челик барча мусобақаларда 31 та ўйинда майдонга тушиб, битта гол урди ва тўртта голли узатмани амалга оширди.
