Мексиканинг Мехико шаҳридаги афсонавий “Ацтека” стадионида футбол бўйича 2026-йилги Жаҳон чемпионатининг А гуруҳи 3-туридан ўрин олган учрашувлар ўз ниҳоясига етди.

Чехия — Мексика

Учрашув тенг курашлар остида бошланди. Ҳар икки жамоа вақти-вақти билан рақиб жарима майдончаси яқинида хавфли ҳужум ташкил қилишга ҳаракат қилиб кўрди. Аммо дарвозалар ишғол қилинмади. Жамоалар эса биринчи таймни 0:0 ҳисобидаги дуранг билан якунлашди.

Биринчи бўлимда ҳисоб очилмаган бўлса-да, иккинчи бўлимда мексикаликлар ўз сўзини айтди. 55-дақиқада Матео Чавес жамоасини ҳисобда олдинга олиб чиққан бўлса, орадан олти дақиқа ўтиб Хулиан Кинёнес ҳисобни ишончли кўринишга келтирди. Учрашув якунига яқин Альваро Фигалдо Мексиканинг 3-голига муаллифлик қилади ва учрашувга якуний нуқтани қўйди. Чехия ўйиннинг қолган дақиқаларида ҳисобни ўзгартиришга уруниб кўрди, аммо рақиб дарвозасини ишғол қила олмади.

Жанубий Африка — Жанубий Корея

Гуруҳнинг параллел кечган иккинчи учрашуви ҳам Мексикада, Монтеррейдаги “Эстадио ББВА” ўйингоҳида бўлиб ўтди. Унда Жанубий Африка Республикаси (ЖАР) ва Жанубий Корея терма жамоалари плей-офф йўлланмаси учун ўзаро майдонга тушди. Боиси, плей-оффга чиқиш учун корейсларни дуранг ҳам қаноатлантирарди, Африка қитъаси вакилларига эса фақат ғалаба зарур эди. Ўта муҳим ҳисобланган ушбу баҳсда африкаликлар 1:0 ҳисобида зафар қучди. Учрашувдаги ягона ва ҳал қилувчи гол 63-дақиқада Тапело Масеко томонидан киритилди. Ўйиннинг қолган дақиқаларида кореяликлар мувозанатни тиклаш учун қанча ҳаракат қилмасин, дарвозалар бошқа ишғол этилмади.

Жаҳон чемпионати
А гуруҳи, 3-тур
Чехия — Мексика 0:2
Голлар: 0:1 — Матео Чавес (55), 0:2 — Хулиан Кинёнес (61), 0:3 — Фигалдо (90+4).

Жанубий Африка — Жанубий Корея 1:0
Гол: 1:0 — Тапело Масеко (63).

Учинчи тур ўйинларидан сўнг А гуруҳида турнир жадвали қуйидагича кўриниш олди:

Мексика — 9 очко;
Жанубий Африка — 4 очко;
Жанубий Корея — 3 очко;
Чехия — 1 очко.

Натижаларга кўра, гуруҳ босқичини юз фоизлик натижа билан якунлаган Мексика ва муҳим ғалабани қўлга киритган Жанубий Африка терма жамоалари тўғридан тўғри плей-офф йўлланмасига эга чиқди. Жанубий Корея эса 3 очко билан учинчи ўринни эгаллади ва энг яхши учинчи ўрин эгалари рейтингини кутишига тўғри келади. Атиги 1 очко жамғарган Чехия эса мусобақа билан хайрлашди.