Ҳужумчи Франко Мастантуоно катта эҳтимол билан кейинги мавсумни ҳам «Реал» сафида ўтказадиган бўлди.

Таниқли журналист Марио Кортегананинг хабар беришича, «қаймоқранглилар»нинг янги бош мураббийи Жозе Моуриньо аргентиналик футболчи иқтидорининг мухлиси ҳисобланади. Аслида Мадрид клуби шу ёзда форвардни тажриба тўплаши учун бошқа жамоага ижарага беришни режалаштирган эди, бироқ эндиликда бунинг эҳтимоли жуда паст. Сабаби Моуриньо «Реал» раҳбариятидан Мастантуонони жамоада олиб қолишни қатъий талаб қилмоқда.

Маълумот учун, Франко Мастантуоно 2025 йили 45 миллион евро эвазига Аргентинанинг «Ривер Плейт» клубидан «Реал»га кўчиб ўтган эди. Унинг мадридликлар билан шартномаси 2031 йилнинг 30 июнига қадар мўлжалланган. Аргентиналик ёш иқтидор якунланган 2025/26 йилги мавсумда «қироллик клуби» сафида барча мусобақаларда 35 та учрашувда майдонга тушиб, ўз ҳисобига 3 та гол ва 1 та голли узатмани ёздириб қўйди. Нуфузли Transfermarkt портали футболчининг трансфер қийматини 45 миллион еврога баҳоламоқда.