Londonning «Arsenal» klubi hujumchisi Viktor Dyokeresh «Tottenxem»ga qarshi o‘yindan so‘ng o‘z fikrlari bilan o‘rtoqlashdi. Angliya chempionatining 27-turidan o‘rin olgan bahs Mikel Arteta shogirdlarining 4:1 hisobidagi g‘alabasi bilan yakunlandi, futbolchi esa dubl qayd etdi.
Sky Sports telekanalining «Bu «Arsenal»dagi eng yaxshi o‘yiningiz bo‘ldimi?» degan savoliga Dyokeresh quyidagicha javob berdi:
«Ba’zi jihatlardan bu yaxshi o‘yin bo‘ldi. Boshqa vaziyatlarda esa bundan ham yaxshiroq harakat qilishim mumkin edi. Og‘ir uchrashuv o‘tkazdik, lekin bugun maydonda chiroyli o‘yin ko‘rsata oldik».
Birinchi gol haqida
«Biz mashg‘ulotlarda bu harakatni bir necha bor repetisiya qilgandik. Men Eberechi qanday gol urganini kuzatgandim va o‘shani takrorlashga harakat qildim. Chiroyli gol bo‘ldi».
Ayni damda «Arsenal» 61 ochko bilan turnir jadvalida peshqadamlik qilmoqda.
