UYEFA Vinisius Junior va Djanluka Prestianni o‘rtasidagi mojaro davom etishidan xavotirda.
O‘tgan haftada Chempionlar ligasining 1/8 finaliga chiqish uchun o‘tkazilgan dastlabki bahsda "Real" "Benfika"ni 1:0 hisobida mag‘lub etgan edi. O‘yin davomida madridliklar vingeri Vinisius arbitr Fransua Leteksyega Prestianni uni "maymun" deb ataganini aytgan va bu paytda og‘zini futbolkasi bilan yopib olgan. "Burgutlar" hujumchisi esa keyinchalik braziliyalik futbolchini irqiy kamsitmaganini ta’kidladi. UEFA mazkur holat bo‘yicha surishtiruv ishlarini boshladi.
"Cadena SER" xabariga ko‘ra, UEFA javob o‘yini oldidan braziliyalik va argentinalik futbolchilar bir-birlari bilan qo‘l berib ko‘rishmasliklaridan xavfsiramoqda, chunki bu "turnir obro‘siga putur yetkazishi" mumkin.
Qayd etilishicha, ittifoq Prestiannini javob o‘yinidan chetlatish imkoniyatini ko‘rib chiqmoqda, biroq bu variantning ehtimoli past deb hisoblanadi. Sababi, odatda intizomiy surishtiruvlar ko‘proq vaqt talab etadi.
Ma’lum qilinishicha, Djanluka UEFA tergovi doirasida bo‘lib o‘tgan voqealar yuzasidan o‘z versiyasini bayon qilib bo‘lgan. Shu bilan birga, ham "Real", ham "Benfika" javob uchrashuvida vaziyat yana keskinlashishi mumkinligini kutishmoqda.
UEFA ushbu vaziyat bo‘yicha seshanba yoki chorshanba kuni rasmiy bayonot berishi kutilmoqda.
"Real" — "Benfika" uchrashuvi 25 fevral kuni Toshkent vaqti bilan soat 01:00 da (26 fevralga o‘tar kechasi) boshlanadi.
