УЕФА Винисиус Жуниор ва Джанлука Престианни ўртасидаги можаро давом этишидан хавотирда.
Ўтган ҳафтада Чемпионлар лигасининг 1/8 финалига чиқиш учун ўтказилган дастлабки баҳсда "Реал" "Бенфика"ни 1:0 ҳисобида мағлуб этган эди. Ўйин давомида мадридликлар вингери Винисиус арбитр Франсуа Летексьега Престианни уни "маймун" деб атаганини айтган ва бу пайтда оғзини футболкаси билан ёпиб олган. "Бургутлар" ҳужумчиси эса кейинчалик бразилиялик футболчини ирқий камситмаганини таъкидлади. УЕФА мазкур ҳолат бўйича суриштирув ишларини бошлади.
"Cadena SER" хабарига кўра, УЕФА жавоб ўйини олдидан бразилиялик ва аргентиналик футболчилар бир-бирлари билан қўл бериб кўришмасликларидан хавфсирамоқда, чунки бу "турнир обрўсига путур етказиши" мумкин.
Қайд этилишича, иттифоқ Престианнини жавоб ўйинидан четлатиш имкониятини кўриб чиқмоқда, бироқ бу вариантнинг эҳтимоли паст деб ҳисобланади. Сабаби, одатда интизомий суриштирувлар кўпроқ вақт талаб этади.
Маълум қилинишича, Джанлука УЕФА тергови доирасида бўлиб ўтган воқеалар юзасидан ўз версиясини баён қилиб бўлган. Шу билан бирга, ҳам "Реал", ҳам "Бенфика" жавоб учрашувида вазият яна кескинлашиши мумкинлигини кутишмоқда.
УЕФА ушбу вазият бўйича сешанба ёки чоршанба куни расмий баёнот бериши кутилмоқда.
"Реал" — "Бенфика" учрашуви 25 февраль куни Тошкент вақти билан соат 01:00 да (26 февралга ўтар кечаси) бошланади.
