Madridning «Atletiko» klubi hujumchisi, norvegiyalik Aleksandr Syorlot UEFA Chempionlar ligasi tarixida «matraschilar» safida xet-trik qayd etgan ikkinchi futbolchiga aylandi. Yevropaning bosh klublar turniri pley-off bosqichi doirasidagi javob uchrashuvida hujumchi Belgiyaning «Bryugge» jamoasi darvozasiga uchta gol urdi (4:1). Jamoalar Madriddagi «Sivitas Metropolitano» stadionida bahs olib borishdi. Uchrashuvni fransiyalik bosh hakam Kleman Tyurpen boshqarib bordi.

Syorlotga qadar «Atletiko» uchun bir o‘yinda uchta gol urish baxti faqat xorvatiyalik Mario Manjukichga nasib etgan edi. Bu voqea 2014 yilning noyabr oyida yuz bergan.

Jamoalar o‘rtasidagi birinchi o‘yin chorshanba, 18 fevral kuni bo‘lib o‘tgan va unda jangovar durang (3:3) qayd etilgan edi. Shu tariqa, «Atletiko» turnirning 1/8 finaliga yo‘l oldi. U yerda madridliklarga «Liverpul» yoki «Tottenxem» jamoalaridan biri raqiblik qiladi.