Мадриднинг «Атлетико» клуби ҳужумчиси, норвегиялик Александр Сёрлот УЕФА Чемпионлар лигаси тарихида «матрасчилар» сафида хет-трик қайд этган иккинчи футболчига айланди. Европанинг бош клублар турнири плей-офф босқичи доирасидаги жавоб учрашувида ҳужумчи Бельгиянинг «Брюгге» жамоаси дарвозасига учта гол урди (4:1). Жамоалар Мадриддаги «Сивитас Метрополитано» стадионида баҳс олиб боришди. Учрашувни франциялик бош ҳакам Клеман Тюрпен бошқариб борди.

Сёрлотга қадар «Атлетико» учун бир ўйинда учта гол уриш бахти фақат хорватиялик Марио Манжукичга насиб этган эди. Бу воқеа 2014 йилнинг ноябрь ойида юз берган.

Жамоалар ўртасидаги биринчи ўйин чоршанба, 18 февраль куни бўлиб ўтган ва унда жанговар дуранг (3:3) қайд этилган эди. Шу тариқа, «Атлетико» турнирнинг 1/8 финалига йўл олди. У ерда мадридликларга «Ливерпуль» ёки «Тоттенхэм» жамоаларидан бири рақиблик қилади.