«Real Madrid» o‘z maydonida Chempionlar ligasi o‘tish bosqichining javob uchrashuvida «Benfika»ni 2:1 hisobida mag‘lub etdi. O‘yin Ispaniyaning «Santyago Bernabeu» stadionida bo‘lib o‘tdi.
Uchrashuvning 14-daqiqasida mehmonlar hujumchisi Rafa Silva hisobni ochdi. Madridliklar tezkorlik bilan javob qaytarishdi — Orelyen Tchuameni muvozanatni tikladi. 32-daqiqada Arda Gyuler mezbonlarning ikkinchi golini urdi, biroq VAR tizimi ofsayd sababli bu golni bekor qildi. Ikkinchi bo‘lim yakunida hujumchi Vinisius Junior darvozabon bilan birga-bir vaziyatdan unumli foydalanib, «qaymoqranglilar»ga g‘alaba keltirdi.
Ikkinchi bo‘limga 9 daqiqa vaqt qo‘shib berildi, chunki 74-daqiqada madridliklar himoyachisi Raul Asensio og‘ir jarohat oldi va maydonni zambilda tark etdi.
Dastlabki o‘yinda ham «Real» 1:0 hisobida g‘alaba qozongan edi. Shu tariqa, Madrid klubi Chempionlar ligasining 1/8 finaliga yo‘l oldi va u yerda «Manchester Siti» yoki «Sporting» jamoalaridan biriga qarshi bahs olib boradi. Qur’a tashlash marosimi juma kuni, 27 fevral sanasida bo‘lib o‘tadi.
Yevropa Chempionlar ligasi. O'tish uchrashuvi. Javob o‘yini
26.02.2026 | 01:00
«Santyago Bernabeu», Madrid
«REAL» (Ispaniya) — «BENFIKA» (Portugaliya) — 2:1
(Birinchi o‘yin — 1:0)
Gollar: Rafa Silva 14 (0:1), Tchuameni 16 (1:1), Vinisius Junior 80 (2:1).
«Real»: Kurtua, Raul Asensio (Alaba, 77), Ryudiger, Karreras (F. Garsiya, 90+1), Aleksandr-Arnold, Tchuameni, Kamavinga (Mastantuono, 77), Valverde, Vinisius Junior, Arda Gyuler (Palasios, 84), G. Garsiya (Pitarch, 84).
«Benfika»: Trubin, Otamendi, Arauju, Dal, Dedich, Barreyru (Lopesh Kabral, 90+1), Rios, Rafa Silva, Shelderup (Barrenechea, 85), Eursnes (Ivanovich, 85), Pavlidis.
Ogohlantirishlar: Raul Asensio (57), Palasios (90) — Rios (35), Otamendi (51).
