«Dinamo» - «Navbahor» (1:2) o‘yinidan keyin dastlab mezbonlar bosh murabbiyi Vadim Abramov matbuot anjumanida qatnashib, savollarga javob qaytardi.

«Nima ham derdim, hamma o‘yinni ko‘rdi – yomon boshlamadik, gol urdik, ammo himoyada xatolarga yo‘l qo‘ydik. Raqibning ilk hujumiyoq darvozamizga belgilangan penalti bilan yakun topdi. Ko‘p o‘tmay, yana oddiy holatda gol o‘tkazib yubordik. Bugun mag‘lubiyat uchun faqat o‘zimiz aybdormiz, chunki noto‘g‘ri o‘ynadik. «Navbahor»ni g‘alaba bilan tabriklayman. Ochilish o‘yinidagi mag‘lubiyat uchun muxlislardan uzr so‘raymiz. Barcha g‘alaba kutgandi. Ammo bu hali birinchi tur, hammasi o‘zimizning qo‘limizda – umid qilamanki to‘g‘ri reaksiya bildira olsak, hammasi yaxshi bo‘ladi.

- «Dinamo» o‘tgan yilgi tarkibi asosini deyarli saqlab qolgan, ammo o‘tgan yilgi o‘yindan hech narsa ko‘rmadik...
- To‘g‘ri, fikringizga qo‘shilaman. Chunki noto‘g‘ri o‘ynadik. Hisobni tezkor gol bilan ochganimizdan keyin bu go‘yo yordam berishi kerak edi, ammo qisqa vaqtdagi xatolardan keyingi gollar jamoaga aks ta’sir qildi. Darhol nimadir deyish qiyin. Tahlil qilib, qayerda noto‘g‘ri ishlaganimizni anglashimiz zarur. Chunki bungacha bugungidek o‘ynamagandik. Bugun juda yomon o‘ynadik.

Mag‘lubiyat uchun kimnidir ayblamayman, butun jamoa noto‘g‘ri o‘ynadi. Mavsum boshida kutilmagan natijalar bo‘lib turadi, 5-turdan keyin kim aslida qanday kuchga ega ekani haqida gapirish mumkin bo‘ladi, - deydi Vadim Karlenovich.

«Dinamo» PFK matbuot xizmati