Madridning "Real" klubi bosh murabbiyi Alvaro Arbeloa "Barselona" ishtirokidagi o‘yinlarni tomosha qilish-qilmasligi haqidagi savolga javob berdi.
— Men imkon tug‘ilishi bilan Ispaniya chempionatining barcha o‘yinlarini kuzatib boraman, — deya ta’kidladi Arbeloa jurnalistlarga.
Arbeloa joriy yilning yanvar oyida Xabi Alonsoning o‘rnini egallab, "Real" bosh murabbiyi etib tayinlangan edi.
25 ta o‘yindan so‘ng "Real" Ispaniya La Ligasi turnir jadvalida 60 ochko bilan ikkinchi o‘rinni egallab turibdi. Peshqadam "Barselona"dan farq to‘rt ochkoni tashkil etadi, biroq "qaymoqranglilar" hisobida bitta zaxira o‘yini mavjud.
2 mart kuni "Real" o‘z maydonida "Xetafe"ni qabul qiladi. Uchrashuv Toshkent vaqti bilan tungi soat 01:00 da (seshanbaga o‘tar kechasi) boshlanishi rejalashtirilgan.
