Angliya futbol assosiasiyasi (FA) videotakrorlar tizimidan (VAR) foydalanish protokolini o‘zgartirish niyatida, deb xabar bermoqda The Daily Telegraph. Manba bergan ma’lumotga ko‘ra, Britaniya futbolining rahbar organi murabbiylarga VAR tizimidan so‘rov asosida foydalanishga ruxsat berish imkoniyatini ko‘rib chiqmoqda.

Ushbu tashabbus o‘yin vaqtidagi to‘xtalishlarni kamaytirish maqsadida hakamlarning sub’ektiv qarorlarini qayta ko‘rib chiqish uchun «murabbiylik chellendji» tizimini joriy etishni nazarda tutadi. Rejaga ko‘ra, jamoa murabbiylari bir o‘yin davomida videotakrorni ko‘rish uchun ikkitadan chellendj (so‘rov) imkoniyatiga ega bo‘lishadi. Agar e’tiroz o‘zini oqlasa, so‘rov huquqi saqlanib qoladi.

Bunga o‘xshash tizim boshqa sport turlarida, xususan, amerika futboli (NFL) va regbi ligasida allaqachon qo‘llanilmoqda. Kutilishicha, faktik holatlar (ofsaydlar, to‘pning maydondan chiqib ketganini aniqlash) avvalgidek avtomatik tarzda tekshiriladi, sub’ektiv vaziyatlar (follar, qo‘l bilan o‘yin, bahsli to‘qnashuvlar) esa faqat murabbiy so‘roviga ko‘ra qayta ko‘rib chiqilishi mumkin bo‘ladi.

So‘rovdan foydalanish uchun murabbiylar zaxira hakamiga maxsus signal berishlari kerak bo‘ladi.

FA bosh kotibi Mark Bullingem ushbu yondashuvni o‘rganishga qiziqish borligini tasdiqladi. «Bu o‘yin dinamikasini o‘zgartiradi, VAR aralashuvlari sonini kamaytiradi va aslida mas’uliyatni murabbiy zimmasiga yuklaydi», — deya Bullingemning so‘zlaridan iqtibos keltiradi The Times nashri.