Англия футбол ассоциацияси (FA) видеотакрорлар тизимидан (ВАР) фойдаланиш протоколини ўзгартириш ниятида, деб хабар бермоқда The Daily Telegraph. Манба берган маълумотга кўра, Британия футболининг раҳбар органи мураббийларга ВАР тизимидан сўров асосида фойдаланишга рухсат бериш имкониятини кўриб чиқмоқда.
Ушбу ташаббус ўйин вақтидаги тўхталишларни камайтириш мақсадида ҳакамларнинг субъектив қарорларини қайта кўриб чиқиш учун «мураббийлик челленджи» тизимини жорий этишни назарда тутади. Режага кўра, жамоа мураббийлари бир ўйин давомида видеотакрорни кўриш учун иккитадан челлендж (сўров) имкониятига эга бўлишади. Агар эътироз ўзини оқласа, сўров ҳуқуқи сақланиб қолади.
Бунга ўхшаш тизим бошқа спорт турларида, хусусан, америка футболи (NFL) ва регби лигасида аллақачон қўлланилмоқда. Кутилишича, фактик ҳолатлар (офсайдлар, тўпнинг майдондан чиқиб кетганини аниқлаш) аввалгидек автоматик тарзда текширилади, субъектив вазиятлар (фоллар, қўл билан ўйин, баҳсли тўқнашувлар) эса фақат мураббий сўровига кўра қайта кўриб чиқилиши мумкин бўлади.
Сўровдан фойдаланиш учун мураббийлар захира ҳакамига махсус сигнал беришлари керак бўлади.
FA бош котиби Марк Буллингем ушбу ёндашувни ўрганишга қизиқиш борлигини тасдиқлади. «Бу ўйин динамикасини ўзгартиради, ВАР аралашувлари сонини камайтиради ва аслида масъулиятни мураббий зиммасига юклайди», — дея Буллингемнинг сўзларидан иқтибос келтиради The Times нашри.
