Angliyaning «Kristal Pelas» klubi bosh murabbiyi Oliver Glasner avtomobil boshqarish huquqidan mahrum qilindi. «Burgutlar» ustozi o‘tgan yilning iyul oyida London bo‘ylab harakatlanayotgan vaqtida tezlikni me’yoridan oshirgan (Old Kent Road hududidagi 20 milya/soat cheklov o‘rnatilgan hududda).
Qoidabuzarlik maxsus kameralar tomonidan qayd etilgan. Sud bayonnomalariga ko‘ra, Glasner o‘z aybini tan olishi haqida ariza bilan murojaat qilgan.
«Men o‘z harakatlarim uchun mas’uliyatni to‘liq anglayman va vaziyatning qanchalik jiddiy ekanini tushunaman. O‘z lavozim majburiyatlarimdan kelib chiqib, ushbu muammoni hal qilish uchun zarur choralarni ko‘raman», — deya Glasnerning so‘zlarini keltiradi The Sun.
Yakunda sud uni 6 oy muddatga avtomobil boshqarish huquqidan mahrum qildi. Bundan tashqari, Glasner jarima to‘lashi va sud xarajatlarini qoplashi belgilandi.
