Англиянинг «Кристал Пэлас» клуби бош мураббийи Оливер Гласнер автомобиль бошқариш ҳуқуқидан маҳрум қилинди. «Бургутлар» устози ўтган йилнинг июль ойида Лондон бўйлаб ҳаракатланаётган вақтида тезликни меъёридан оширган (Old Kent Road ҳудудидаги 20 миля/соат чеклов ўрнатилган ҳудудда).

Қоидабузарлик махсус камералар томонидан қайд этилган. Суд баённомаларига кўра, Гласнер ўз айбини тан олиши ҳақида ариза билан мурожаат қилган.

«Мен ўз ҳаракатларим учун масъулиятни тўлиқ англайман ва вазиятнинг қанчалик жиддий эканини тушунаман. Ўз лавозим мажбуриятларимдан келиб чиқиб, ушбу муаммони ҳал қилиш учун зарур чораларни кўраман», — дея Гласнернинг сўзларини келтиради The Sun.

Якунда суд уни 6 ой муддатга автомобиль бошқариш ҳуқуқидан маҳрум қилди. Бундан ташқари, Гласнер жарима тўлаши ва суд харажатларини қоплаши белгиланди.