Португалия футбол федерацияси президенти Педру Проэнса миллий жамоа бош мураббийи Жорже Жезуш ва ҳужумчи Криштиану Роналду ўртасидаги келишмовчиликка муносабат билдирди.
«Мен бу борада ҳеч қандай изоҳ бермайман, чунки бу мутахассис ва футболчилар ўртасидаги одатий мулоқот. Бу мураббийнинг масъулият доирасига киради, ФПФ раҳбари эса бундай масалаларга аралашмайди.
У тарихдаги энг буюк футболчи. У 20 йилдан ортиқ вақт давомида Португалия футболига хизмат қилди. Криштиану Роналду — миллий ўзлигимизнинг асосий тимсолларидан бири. Биз унга ўз ҳурматимизни билдиришимиз шарт.
У миллий жамоага фақат спорт нуқтаи назаридан чақирилади ва бунга ҳеч қандай шубҳа йўқ. У жисмоний имкониятлари имкон берган вақтга қадар жамоада қолади. Криштиану бу ҳолатдан хабардор.
Агар келишмовчиликнинг бевосита сабаби ҳақида гапирадиган бўлсак, бу жамоа ичида бартараф этилиши керак бўлган оддий тушунмовчилик. Кеча матбуот анжуманига чиққан футболчилар амалдаги сардор билан мустаҳкам алоқаларини яққол намойиш этишди.
У миллий жамоанинг бир қисми, у бизнинг байроқдоримиз. Криштиану ушбу тўртта учрашувнинг дастлабкисида жамоадошларини капитанлик боғичи билан майдонга бошлаб тушди. Мураббий эса унинг жисмоний ҳолати талаб даражасида бўлган тақдирда унга таянишини айтмоқда. Бу ҳар қандай футболчига тааллуқли.
Криштиану Роналду — жаҳон аренасида Португалиянинг юзи, ўзига хос иқтидор соҳиби. У жаҳон чемпионатидан кейин бутсаларини михга илиб, фаолиятини якунлаши мумкин эди, аммо терма жамоага садоқати туфайли бу фикридан воз кечди.
Мен шахсан Криштиану ва Португалия жамияти ҳамда миллий жамоаси ўртасидаги боғлиқликни кузатиб бораман.
Шунинг учун ҳозир, бу тўртта учрашув ортда қолганидан сўнг — биз учун уларни хотиржам муҳитда ўтказиш жуда муҳим эди, чунки асосий эътиборимиз футбол масалаларига қаратилганди — ушбу тушунмовчиликни хотиржам муҳитда муҳокама қилиш учун вақт ва имкониятимиз бўлади.
Бундай вазиятлар жараёнда уч томон — ФПФ, бош мураббий ва футболчилар — иштирок этган тақдирдагина ҳал қилинади.
Роналду — бизнинг бойлигимиз. У мураббий қанча вақт зарур деб ҳисобласа, шунча вақт унинг ихтиёрида бўлади», — дея Проэнсанинг сўзларини Record нашри келтирган.
Роналду Миллатлар лигасининг 3-турида Данияга қарши учрашув (4:2) олдидан, бош мураббий Жорже Жезушнинг жамоа ичида ҳеч қандай зиддият йўқлиги ҳақидаги баёнотларига қарамай, терма жамоа қароргоҳини тарк этганди.
Португалиянинг бир қатор оммавий ахборот воситалари Роналду миллий терма жамоадаги фаолиятини якунлаш ниятида экани ҳақида хабар берди. Шунингдек, Жезуш ҳужумчи билан ярашув учрашувини ўтказишга рози бўлгани ва футболчини ноябрь ойидаги ўйинлар учун қайдномага киритишни режалаштираётгани ҳақида ҳам маълумотлар тарқалди.
