Собиқ футболчи Гари Невилл Англия Премьер-лигасининг саккизинчи турида "Борнмут"дан йирик ҳисобда мағлуб бўлганидан (0:3) кейин "Манчестер Юнайтед" Майкл Кэррикни ишдан бўшатмагани ҳақидаги хабарга муносабат билдирди.
Аввалроқ "қизил иблислар" раҳбарияти бош мураббийни истеъфога чиқаришга шошилмасликка қарор қилгани хабар қилинган эди. Мутахассисга вазиятни тўғрилаш учун вақт берилди.
"Мен ҳайратдаман, аммо бундан хурсандман, чунки якшанба куни кўрганларим Майкл учун охирги нуқта бўлишига мутлақо ишонган эдим. У шу футболчиларни яна ўзи учун ўйнашга қандайдир тарзда ундай олади, деб умид қиламан. Чунки сўнгги бир неча ҳафтада улар унинг учун ўйнамаётган эди", — деди Невилл Sky Sports эфирида.
Англия чемпионатида кетма-кет олтита ўйинда ғалаба қозона олмаган манкунианликлар турнир жадвалида 16-ўринда бормоқда. Келаси шанба куни Кэррик жамоаси сафарда "Челси"га қарши майдонга тушади.
