Италиянинг “Жульяно” клуби Ўзбекистон терма жамоаси мураббийлар штабида фаолият юритаётган Паоло Каннаварони бош мураббийликка таклиф қилмоқчи бўлган. Бироқ томонлар оғзаки келишувга эришганига қарамай, мутахассис Италия клубини бошқаришдан воз кечиб, Ўзбекистон терма жамоасида қолишга қарор қилган. Бу ҳақда TuttoMercatoWeb нашри хабар берди.
Манбага кўра, “Жульяно” Раффаэле Ди Наполини истеъфога чиқарганидан сўнг 45 ёшли Паоло Каннаварони асосий номзод сифатида кўрган. Томонлар 2027 йил июнигача мўлжалланган, узайтириш имконияти ҳам мавжуд шартнома бўйича оғзаки келишувга эришган. Бироқ мураббийнинг Ўзбекистон терма жамоаси билан амалдаги шартномаси келишувнинг амалга ошишига тўсқинлик қилган. Италияда мустақил мураббийлик фаолиятига қайтиши учун у Ўзбекистон томони билан шартномани бекор қилиш масаласини ҳал этиши керак эди.
Якунда Паоло Каннаваро камида 2027 йилги Осиё Кубогигача Ўзбекистон терма жамоасида қолишга қарор қилган.
Паоло Каннаваро 2026 йил бошида Ўзбекистон терма жамоаси мураббийлар штабига қўшилган. Италия матбуоти унинг жамоа билан ишлаётганини январь ойида Дубайда ўтказилган йиғин вақтидаёқ ёзган. Март ойида эса журналист Николо Скира мутахассиснинг мураббийлар штабига расман киргани ҳақида хабар берган. Ўзбекистон футбол ассоциацияси унинг тайинлангани ҳақида алоҳида эълон бермаган.
Паоло ва унинг акаси Фабио Каннаваро аввал Хитойнинг “Гуанчжоу” клубида, шунингдек, Италиянинг “Беневенто” ва “Удинезе” жамоаларида бирга ишлаган. Паоло Ўзбекистон терма жамоасининг 2026 йилги Жаҳон чемпионатига тайёргарлик жараёнида ва мундиалнинг ўзида ҳам мураббийлар штабида бўлган. Турнирдан кейин ҳам фаолиятини давом эттирган. Сентябрь ойида у навбатдаги йиғинга тайёргарлик кўриш учун жамоа билан Тошкентда бўлган.
Фабио Каннаваро 2025 йил октябридан буён Ўзбекистон миллий терма жамоасини бошқариб келмоқда. У тайинланганида ЎФА биринчи вице-президенти Равшан Эрматов бош мураббий билан 2+3 шаклидаги шартнома имзоланганини маълум қилганди.
