Хитой Халқ Республикасининг асосий давлат телерадиокорпорацияси — China Media Group Мадриднинг «Реал» клуби ҳужумчиси Килиан Мбаппенинг яқинда юзага келган халқаро медиа жанжалидан кейин омма олдида узр сўраганига расмий муносабат билдирди.
«Биз Ла Лига раҳбарияти, Мадриднинг “Реал” клуби ва Килиан Мбаппенинг ўзи ушбу воқеадан сабоқ чиқаришига, чин дилдан узр сўрашига ҳамда йўл қўйилган хатоларни қатъий равишда тузатишига самимий умид қиламиз», — дея корпорация вакилининг сўзларини Madrid Sports нашри ижтимоий тармоқдаги Х саҳифасида келтирди.
Эслатиб ўтамиз, аввалроқ Vozpópuli нашри Испаниянинг «Ла Лига» чемпионати Хитойнинг Migu стриминг хизмати билан 2030 йилгача амал қиладиган, қиймати тахминан €400 млн бўлган узоқ муддатли шартномани бекор қилиш хавфига дуч келгани ҳақида хабар берганди.
Бунга Килиан Мбаппенинг ўз севимли меми ҳақида гапириб, унда ўзи «хитойлик диктатор қиёфасида» тасвирланганини айтиши сабаб бўлган. Футболчи бу орқали Мао Цзэдунни назарда тутган.
