«Real Madrid» bosh murabbiyi Alvaro Arbeloa mavsumni sovrinsiz yakunlash ehtimoli haqidagi savolga istehzo bilan javob qaytardi.

Bundan avval madridliklar Ispaniya chempionatida ketma-ket ikkita o‘yinda mag‘lub bo‘lishdi va La Liga turnir jadvalida «Barselona»dan 4 ochkoga ortda qolishmoqda. Ertaga «Real» Ispaniya chempionatining 27-turi doirasida safarda «Selta» mehmoni bo‘ladi.

— Mavsumni sovrinsiz yakunlash siz uchun muvaffaqiyatsizlik bo‘ladimi?

— Yana shu savolmi? Hammamiz o‘ta «optimistik» kayfiyatdamiz. To‘g‘risini aytsam, men hozir faqat «Selta» haqida o‘ylayapman va boshqa hech narsa haqida emas.

— Barqarorlikni topish borasidagi asosiy muammo nimada?

— Bu oson emas. Mening gaplarim bir xillikdek tuyulishi mumkin, lekin bizda ishlash uchun yetarli vaqt bo‘lmadi — o‘yinlarimiz soni mashg‘ulotlarimizdan ko‘proq bo‘lib ketdi. Hozirgi lahzalardan boshlab futbolchilarning jamoaga integrasiyasi va men bilan ular o‘rtasidagi jipslik jarayoni boshlanadi. Albatta, biz barqarorroq o‘yin ko‘rsatishimiz shart, — dedi Arbeloa matbuot anjumanida.