«Bornmut» yarim himoyachisi Tayler Adams Angliya Premyer-ligasi grandlarining e’tiborini tortmoqda. «Caught Offside» nashrining xabariga ko‘ra, 27 yoshli futbolchining transferiga «Liverpul», «Manchester Yunayted» va «Chelsi» klublari qiziqish bildirmoqda. Kutilishicha, «olchalar» amerikalik tayanch yarim himoyachisi uchun 30 million funt sterling (taxminan 35 million yevro) talab qiladi.
«Transfermarkt» portali ekspertlari Tayler Adamsning qiymatini 25 million yevroga baholashmoqda. Uning «Bornmut» bilan amaldagi shartnomasi 2028 yilning yoziga qadar mo‘ljallangan. Joriy mavsumda Andoni Iraola qo‘l ostida futbolchi 19 ta o‘yinda maydonga tushib, o‘z hisobiga ikkita gol va bitta golli uzatmani yozdirib qo‘yishga ulgurdi.
