«Chelsi» sardori Ris Jeyms klub bilan yangi olti yillik shartnoma imzoladi, deya xabar bermoqda The Athletic nashri.

Himoyachining avvalgi kelishuvi 2028 yilning iyunigacha amal qilar edi. Yangi shartnoma esa 2032 yil yozigacha mo‘ljallangan bo‘lib, u klub tomonidan 2022 yil may oyida joriy etilgan ish haqi tuzilmasiga muvofiqlashtirilgan.

Qayd etilishicha, Jeymsning so‘nggi shartnomasi amaldagi xo‘jayinlar davrida imzolangan bo‘lsa-da, u jamoada eski shartlar asosida qolayotgan oxirgi futbolchi edi. Endilikda uning maoshi ham yangi rahbariyat tomonidan belgilangan rag‘batlantirish tizimiga o‘tkazildi.

26 yoshli ingliz futbolchisi «ko‘klar» akademiyasi tarbiyalanuvchisi hisoblanadi va 6 yoshidan buyon klub tizimida to‘p surib kelmoqda.

Joriy mavsumda Ris APL doirasida 26 ta o‘yinda maydonga tushib, 2 ta gol urdi va 4 ta golli uzatmani amalga oshirdi.