«Santos» hujumchisi Neymar jahon chempionati arafasida Braziliya terma jamoasiga qaytish niyati borligini ma’lum qildi.
Yakshanba kuni 34 yoshli futbolchi Braziliya Seriya A doirasidagi «Korintians»ga qarshi bahsda (1:1) golli uzatmani amalga oshirdi. O‘yindan so‘ng jurnalistlar yulduz forvardga milliy terma jamoa haqida savol berishdi.
«Men Braziliya terma jamoasiga qaytishni va jahon chempionatida o‘ynashni istayman, biroq yakuniy qarorni murabbiylar shtabi qabul qiladi. Meni chaqirishsa ham, chaqirishmasa ham, men doimo milliy jamoamizni qo‘llab-quvvatlayman», — deya The Touchline nashri Neymarning so‘zlarini keltirmoqda.
26 va 31 mart kunlari «pentakampeonlar» Fransiya va Xorvatiya terma jamoalariga qarshi o‘rtoqlik uchrashuvlarini o‘tkazishadi.
