«Barselona» himoyachi Andreas Kristensenning shartnomani uzaytirish borasidagi qarorini kutmoqda.

Avvalroq, klub tizzasidagi jarohat (xochsimon paylar uzilishi) sababli safdan chiqqan futbolchini qo‘llab-quvvatlash maqsadida shartnomani uzaytirishga tayyorligi haqida xabar berilgan edi. Keyinchalik ma’lum bo‘lishicha, unga 2 yilga mo‘ljallangan va maoshi sezilarli darajada qisqartirilgan kelishuv taklif qilingan. Daniyalik himoyachining amaldagi shartnomasi shu yozda o‘z nihoyasiga yetadi.

Marca nashrining yozishicha, klub ancha vaqtdan beri futbolchining agenti bilan muzokaralar olib bormoqda, biroq hozircha hech qanday natija yo‘q. «Barselona» vaziyatni ortiqcha cho‘zishni istamayapti va o‘zgarmas bo‘lgan so‘nggi taklifini berdi. Klub yaqin orada javob kutmoqda, agar rad javobi berilsa, boshqa variantlarni ko‘rib chiqishni boshlaydi.

Qayd etilishicha, «Barselona» ushbu taklifni xayrixohlik ishorasi sifatida ko‘rmoqda. Chunki 29 yoshli futbolchiga og‘ir jarohatdan so‘ng boshqa jamoa bilan kelishib olish qiyin kechadi. Bundan tashqari, klub Kristensenning namunali xulq-atvorini va klub haqida hech qachon yomon gapirmaganini qadrlaydi.

Joriy va o‘tgan mavsumda himoyachi jami 106 ta o‘yindan faqat 23 tasida ishtirok etdi, bu esa umumiy o‘yinlarning bor-yo‘g‘i 21,7 foizini tashkil etadi.