Madridning «Real» klubi bosh murabbiyi Alvaro Arbeloa «Atletiko»ga qarshi kechgan derbida (3:2) jamoasi nimaning hisobiga g‘alaba qozongani haqida gapirib berdi.
«Qaymoqranglilar» uchrashuvda birinchi bo‘lib gol o‘tkazib yuborishgan bo‘lsa-da, o‘z maydonlarida azaliy raqib ustidan g‘alabani ilib ketishga muvaffaq bo‘lishdi.
«Biz buni uddaladik. Vazifa bajarildi. Mening fikrimcha, g‘alabaning asosiy omili «Real»ga xos bo‘lgan o‘sha mashhur mentalitet bo‘ldi va u bizga yordam berdi. Biz 0:1 hisobida yutqazayotgan edik, keyin oldinga chiqib oldik va yana gol o‘tkazib yubordik, ammo hujumga o‘tib, g‘alaba golini kiritdik.
O‘yin oson kechmadi — «Atletiko» bizga ko‘plab muammolar tug‘dirdi. Menga jamoamning ishtiyoqi juda ma’qul keldi. Futbolchilar «Real» emblemasiga loyiq bo‘lgan xarakterni namoyish etishdi», — deya ta’kidladi Arbeloa jurnalistlar bilan suhbatda.
«Real» La Liga turnir jadvalida hamon ikkinchi o‘rinda bormoqda va «Barselona»dan to‘rt ochkoga ortda qolmoqda.
