Мадриднинг «Реал» клуби бош мураббийи Альваро Арбелоа «Атлетико»га қарши кечган дербида (3:2) жамоаси ниманинг ҳисобига ғалаба қозонгани ҳақида гапириб берди.

«Қаймоқранглилар» учрашувда биринчи бўлиб гол ўтказиб юборишган бўлса-да, ўз майдонларида азалий рақиб устидан ғалабани илиб кетишга муваффақ бўлишди.

«Биз буни уддаладик. Вазифа бажарилди. Менинг фикримча, ғалабанинг асосий омили «Реал»га хос бўлган ўша машҳур менталитет бўлди ва у бизга ёрдам берди. Биз 0:1 ҳисобида ютқазаётган эдик, кейин олдинга чиқиб олдик ва яна гол ўтказиб юбордик, аммо ҳужумга ўтиб, ғалаба голини киритдик.

Ўйин осон кечмади — «Атлетико» бизга кўплаб муаммолар туғдирди. Менга жамоамнинг иштиёқи жуда маъқул келди. Футболчилар «Реал» эмблемасига лойиқ бўлган характерни намойиш этишди», — дея таъкидлади Арбелоа журналистлар билан суҳбатда.

«Реал» Ла Лига турнир жадвалида ҳамон иккинчи ўринда бормоқда ва «Барселона»дан тўрт очкога ортда қолмоқда.