Meksika va Portugaliya terma jamoalari ustozlari 28 mart kuni yangilangan «Asteka» stadionida bo‘lib o‘tgan o‘rtoqlik uchrashuvi yakunlari bo‘yicha o‘z fikrlari bilan o‘rtoqlashdilar. Uchrashuv 0:0 hisobidagi durang bilan yakunlandi.

«Bu bo‘lishi mumkin bo‘lgan eng yaxshi ssenariy. Avval aytganimdek, bu yerda o‘ynash uchun jasorat kerak, chunki muxlislar talabchan, ular g‘alabalarni va chiroyli futbol ko‘rishni istaydilar», — deya Meksika terma jamoasi murabbiyi Xavyer Agirrening so‘zlarini keltiradi The Straits Times.

«Futbolchilar uchrashuv yakuniga qadar kuchli raqib bo‘lgan Portugaliyaga qarshi bor kuchlarini berishdi. Ular kuchli o‘nlikka kiradigan, haqiqatan ham qudratli terma jamoa hisoblanadi», — deya qo‘shimcha qildi Agirre.

«Menimcha, biz raqib darvozasiga 10 marta zarba berdik, bu biz ko‘zlagan maqsadga yaqin ko‘rsatkich. Yomon tomoni shundaki, aniq zarbalar soni kam bo‘ldi, bizga aniqlik yetishmadi», — dedi Portugaliya terma jamoasi murabbiyi Roberto Martines.

«Muvaffaqiyat yoki muvaffaqiyatsizlik faqat hisobga bog‘liq emas. Hozirgi kunda ko‘plab turli omillar muhim rol o‘ynaydi. O‘ylaymanki, ushbu 90 daqiqadan so‘ng jamoa Jahon chempionatiga yaxshiroq tayyor bo‘ldi».

Meksika 31 mart kuni o‘rtoqlik uchrashuvida Belgiya bilan to‘qnash keladi, Portugaliya esa shu kuni Jahon chempionatining yana bir mezboni — AQSH jamoasi bilan kuch sinashadi.