«Barselona» prezidenti Joan Laporta hujumchi Lionel Messining 2021 yilda Kataloniya klubidan ketgani haqida fikr bildirdi.

«Messining ketishimi? Bu men hamisha yodda tutadigan voqea. Shuningdek, Leo aynan men prezident bo‘lgan davrda asosiy jamoada debyut qilgani haqida o‘ylashni yaxshi ko‘raman. Va men prezidentlik qilgan ko‘p yillar davomida u dunyoning eng yaxshi futbolchisi bo‘lib keldi. Keyin esa men bir qarorga kelishimga to‘g‘ri keldi va o‘ylaymanki, to‘g‘ri yo‘l tutdim... Natijalarning o‘zi hammasini aytib turibdi.

Biz klub iqtisodiyotini tiklashga muvaffaq bo‘ldik, raqobatbardosh jamoa tuzdik va avlodlar almashinuvi vaqti kelgan edi. Leo o‘z faoliyatining so‘nggi bosqichida edi, bizga esa yangi jamoa qurish kerak edi. Men yangi jamoani Leo bilan birga qurishni istarmidim? Ha. Biz bunga harakat qildik, lekin o‘xshamadi», — deya Laportaning so‘zlarini keltiradi «Barca Universal».

Lionel Messi 2003 yildan 2021 yilgacha «Barselona»ning asosiy jamoasida to‘p surgan. Umumiy hisobda Leo «ko‘k-anorranglilar» safida 778 ta o‘yin o‘tkazib, ularda 672 ta gol urdi va 303 ta golli uzatmani amalga oshirdi.