«Chelsi» yarim himoyachisi Enso Fernandes o‘z bayonoti bilan Madridning «Real» klubiga ehtimoliy o‘tishi haqidagi mish-mishlarni yanada avj oldirdi.

Argentinalik futbolchi Ispaniya poytaxti unga juda yoqishini tan oldi.

«Men Madridda yashashni istardim. Bu ajoyib shahar, u menga Buenos-Ayresni eslatadi», — deya jurnalist Fabrisio Romano 25 yoshli futbolchining so‘zlarini keltirmoqda.

Shundan so‘ng, aniq bir klub haqida berilgan savolga xavbek javob bermadi — u shunchaki tabassum qilish bilan kifoyalandi.

Enso Fernandesning nomi anchadan beri «Real» bilan bog‘lab kelinmoqda. Transfermarkt portali ekspertlari futbolchining qiymatini 90 million yevroga baholashmoqda, uning «Chelsi» bilan amaldagi shartnomasi esa 2032 yilning o‘rtalarigacha mo‘ljallangan.