Bugun, 4 aprel kuni Angliya Kubogi chorak finali doirasida «Manchester Siti» «Liverpul»ga qarshi bahs olib boradi. Bo‘lajak uchrashuv haqida «shaharliklar» bosh murabbiyi Xosep Gvardiola o‘z fikrlarini bildirdi.
Ispaniyalik mutaxassis uning jamoasi barcha Angliya turnirlarida barqaror va yaxshi natijalar ko‘rsatib kelayotganini ta’kidladi.
«Bizda yana bir aql bovar qilmas natijaga erishish imkoniyati bor — ketma-ket sakkiz marta [Angliya Kubogi] yarim finaliga chiqish. Bunaqasi ilgari hech qachon sodir bo‘lmagan. Bu juda nufuzli turnir. Biz uchun alohida ahamiyatga ega bo‘lgan raqibga qarshi yana bir o‘yin. Umid qilamanki, muxlislar bizga yarim finalga yo‘l olishimizda yordam berishadi», — dedi murabbiy.
Angliya Premyer-ligasi turnir jadvalida «Manchester Siti» ikkinchi o‘rinni egallab turibdi va peshqadam «Arsenal»dan 9 ochkoga ortda qolmoqda.
