Milanning "Inter" klubi hujumchisi Markus Tyuram A Seriyaning "Roma"ga qarshi kechgan yakshanba kungi bahsida (5:2) o‘yin qahramoniga aylandi.
Fransiyalik futbolchi o‘z hisobiga bitta gol va ikkita golli uzatmani yozdirib qo‘ydi. Hujumchi qariyb ikki oy ichida ilk bor "neradzurrilar" safida gol urishga muvaffaq bo‘ldi – uning golsiz seriyasi sakkizta o‘yin davom etgan edi.
"Hujumchi gol urishi kerak! "To‘qqizlik" uch oy davomida golsiz qolishi mumkin emas, lekin men jamoaga qo‘limdan kelgan barcha usullar bilan yordam berishga harakat qilaman. Menda pasayish bo‘ldi va umid qilamanki, bu boshqa takrorlanmaydi", – dedi Tyuram Sky Sportga bergan intervyusida.
28 yoshli futbolchi joriy mavsumda "Inter" safida jami 37 ta o‘yinda maydonga tushib, 13 ta gol va 7 ta golli uzatmani amalga oshirdi.













