Миланнинг "Интер" клуби ҳужумчиси Маркус Тюрам А Сериянинг "Рома"га қарши кечган якшанба кунги баҳсида (5:2) ўйин қаҳрамонига айланди.

Франциялик футболчи ўз ҳисобига битта гол ва иккита голли узатмани ёздириб қўйди. Ҳужумчи қарийб икки ой ичида илк бор "нерадзуррилар" сафида гол уришга муваффақ бўлди – унинг голсиз серияси саккизта ўйин давом этган эди.

"Ҳужумчи гол уриши керак! "Тўққизлик" уч ой давомида голсиз қолиши мумкин эмас, лекин мен жамоага қўлимдан келган барча усуллар билан ёрдам беришга ҳаракат қиламан. Менда пасайиш бўлди ва умид қиламанки, бу бошқа такрорланмайди", – деди Тюрам Sky Sportга берган интервьюсида.

28 ёшли футболчи жорий мавсумда "Интер" сафида жами 37 та ўйинда майдонга тушиб, 13 та гол ва 7 та голли узатмани амалга оширди.