Dunyoning birinchi raqamli shaxmatchisi Magnus Karlsen o‘zbekistonlik grossmeyster Javohir Sindorovning FIDE Nomzodlar turniridagi ishtiroki haqida o‘z fikrlari bilan bo‘lishdi.

Norvegiyalik grossmeysterning aytishicha, hatto uning turmush o‘rtog‘i ham o‘zbekistonlik sportchining natijalariga qiziqib qolgan.

“O‘tgan kuni ayolim mendan Sindorovning natijalari haqida so‘radi: "Sindorov nimalar qilyapti? Sen o‘zing qachondir shunday natija qayd etganmisan?" deb qoldi. Men esa "Savol uchun rahmat, lekin yo‘q, hali bunday natijaga erishmaganman", deb javob berdim. Javohirning hozirgi holati va natijasi uning qanchalik yuqori darajadagi shaxmatchi ekanligini ko‘rsatadi”, deydi Karlsen FIDE matbuot xizmatiga bergan intervyusida.

​Ma’lumot uchun, Kiprda bo‘layotgan Nomzodlar turnirining birinchi davrasi yakuniga ko‘ra Javohir Sindorov 6 ochko bilan peshqadamlik qilmoqda. Javohir ortda qolgan turlarda dunyoning eng kuchli shaxmatchilari — Fabiano Karuana, Hikaru Nakamura, Rameshbabu Pragnanandha, Vey I va Andrey Yesipenko ustidan g‘alaba qozondi. Faqatgina Mattias Blubaum va Anish Giri bilan durang qayd etildi.

Eslatib o‘tamiz, avvalroq Nomzodlar turniri ishtirokchilari qancha mablag‘ ishlab topishi mumkinligi haqida xabar berilgandi. Shuningdek, O‘zbekistonning birinchi raqamli grossmeysteri Nodirbek Abdusattorov ham Javohir Sindorovning ushbu musobaqadagi imkoniyatlari haqida o‘z fikrlarini bildirib o‘tgan.