Angliyaning «Arsenal» klubi hujumchisi Gabriel Martinelli Chempionlar Ligasi 1/4 finali dastlabki uchrashuvida Portugaliyaning «Sporting» jamoasi ustidan qozonilgan g‘alaba (1:0) haqida fikr bildirdi. Uchrashuvdagi yagona gol 90+1-daqiqada Kay Xaverts tomonidan kiritildi.
«Biz «Sporting» qanchalik kuchli ekanligini bilardik. Oxirgi hafta davomida buni Viktor [Dyokeresh] bilan ko‘p muhokama qildik. U bizga «Sporting» haqida ko‘p narsalarni so‘zlab berdi. Bundan tashqari, ko‘plab videomateriallarni ko‘rib chiqdik. Bu yerga kelib, gol o‘tkazmasdan g‘alabani ilib ketish juda qiyin, ammo biz bunga loyiq edik. Juda xursandman, lekin bu hali birinchi o‘yin. Javob bahsiga ham xuddi shunday kayfiyatda yondashamiz», — deya Martinellining so‘zlarini UYEFA rasmiy sayti keltirmoqda.
