Meksika prezidenti Klaudiya Sheynbaum FIFA 2026 yilgi jahon chempionati guruh bosqichida Eron milliy jamoasi ishtirokidagi o‘yinlarni AQSHdan Meksikaga ko‘chirmaslik haqida yakuniy qaror qabul qilganini bildirdi.
«Oxir-oqibat federasiya o‘yinlarni dastlab belgilangan joylardan ko‘chirish mumkin emas, degan qarorga keldi. Bunday qadam FIFAdan juda katta logistik sa’y-harakatlarni talab qiladi», — dedi Sheynbaum.
Eron terma jamoasi guruh bosqichidagi barcha uchta o‘yinni AQSHda o‘tkazishi kerak. G guruhida Eron Belgiya, Yangi Zelandiya va Misrga qarshi maydonga tushadi.
Avvalroq Eron xavfsizlik sabablarini keltirib, o‘z o‘yinlarini AQSHda emas, balki Meksikada o‘tkazishni so‘ragan edi.
48 ta jamoa ishtirok etadigan 2026 yilgi jahon chempionati 11 iyundan 19 iyulgacha AQSH, Meksika va Kanadada bo‘lib o‘tadi.













