«Selta» himoyachisi Oskar Mingesa yozgi transfer bozorida eng talabgir futbolchilardan biriga aylanish uchun yaxshi imkoniyatga ega. Bu haqda TeamTALK nashri xabar bermoqda.

26 yoshli ispaniyalik futbolchining «Selta» bilan shartnomasi shu mavsum oxirida yakuniga yetadi. Uning amaldagi kelishuvni uzaytirmaslik ehtimoli tobora ortib bormoqda, bu esa futbolchining erkin agent sifatida boshqa klubga o‘tishi uchun yo‘l ochadi.

Manbaning ko‘rsatishicha, Mingesa «Manchester Siti», «Arsenal», «Liverpul» va «Tottenxem» kabi jamoalarning e’tiborini tortgan. «Nyukasl», «Aston Villa» va «Everton» klublari ham deyarli bir yildan beri futbolchini kuzatib kelishmoqda, biroq ularning Mingesani qo‘lga kiritish imkoniyatlari hozircha past baholanmoqda.

«Barselona» akademiyasi tarbiyalanuvchisi bo‘lgan Oskar asosiy jamoada bir necha mavsum o‘tkazgan bo‘lsa-da, u yerda muqim o‘rin egallay olmadi va yakunda 2022 yilda «Selta»ga o‘tdi.

Joriy mavsumda 26 yoshli himoyachi 38 ta o‘yinda maydonga tushib, 1 ta gol urdi, 6 ta golli uzatmani amalga oshirdi va 7 ta ogohlantirish oldi. Transfermarkt talqiniga ko‘ra, uning bozor qiymati 18 million yevroni tashkil etadi.