«Сельта» ҳимоячиси Оскар Мингеса ёзги трансфер бозорида энг талабгир футболчилардан бирига айланиш учун яхши имкониятга эга. Бу ҳақда TeamTALK нашри хабар бермоқда.

26 ёшли испаниялик футболчининг «Сельта» билан шартномаси шу мавсум охирида якунига етади. Унинг амалдаги келишувни узайтирмаслик эҳтимоли тобора ортиб бормоқда, бу эса футболчининг эркин агент сифатида бошқа клубга ўтиши учун йўл очади.

Манбанинг кўрсатишича, Мингеса «Манчестер Сити», «Арсенал», «Ливерпуль» ва «Тоттенхэм» каби жамоаларнинг эътиборини тортган. «Ньюкасл», «Астон Вилла» ва «Эвертон» клублари ҳам деярли бир йилдан бери футболчини кузатиб келишмоқда, бироқ уларнинг Мингесани қўлга киритиш имкониятлари ҳозирча паст баҳоланмоқда.

«Барселона» академияси тарбияланувчиси бўлган Оскар асосий жамоада бир неча мавсум ўтказган бўлса-да, у ерда муқим ўрин эгаллай олмади ва якунда 2022 йилда «Сельта»га ўтди.

Жорий мавсумда 26 ёшли ҳимоячи 38 та ўйинда майдонга тушиб, 1 та гол урди, 6 та голли узатмани амалга оширди ва 7 та огоҳлантириш олди. Transfermarkt талқинига кўра, унинг бозор қиймати 18 миллион еврони ташкил этади.