«Manchester Siti» bosh murabbiyi Xosep Gvardiola Angliya chempionligi uchun «Arsenal» bilan kechayotgan poyga haqida fikr bildirdi. Hozirda «shaharliklar» «kanonirlar»dan olti ochko orqada qolmoqda, biroq Gvardiola shogirdlarida zaxira o‘yini mavjud. Bundan tashqari, keyingi turda «Manchester Siti» o‘z maydonida aynan «Arsenal»ni qabul qiladi.

«Biz 49 ta o‘yinda bor-yo‘g‘i uch marta mag‘lub bo‘lgan, Chempionlar ligasida esa umuman yutqazmagan jamoaga qarshi o‘ynashimiz kerak. Liga Kubogi finalida biz yaqqol autsayder edik — bu mamlakatda hech kim bizning ulardan ancha ustun bo‘lishimizga 1 funt ham tikmagan bo‘lardi. Ehtimol, hozir vaziyat biroz o‘zgargandir.

Men «Arsenal»ning so‘nggi yillarda amalga oshirgan ishlarini hurmat qilaman. Ularning murabbiyini, futbolchilarini va mahoratini bilaman. Ular har qanday vaziyatda raqobatlasha oladilar. Oldimizda katta vazifa turibdi. Taktik jihatlarga kelsak — balki, ba’zi o‘zgarishlarni amalga oshirarmiz.

«Arsenal» ushbu mamlakat va Yevropadagi eng yaxshi jamoa maqomida edi. Ularni bir marta mag‘lub etish — juda qiyin. Endi tasavvur qiling, bir necha hafta ichida ularni ikkinchi bor yutish qanday bo‘larkin? Biz dam olishimiz kerak. Muxlislarimizga shuni aytgan bo‘lardim: «Arsenal»ni hurmat qiling, bu ajoyib jamoa. Stadionga keling va bizni birinchi daqiqadanoq qo‘llab-quvvatlang, chunki futbolchilar borini berib o‘ynashadi», — dedi Gvardiola Sky Sports nashriga.

«Manchester Siti» 19 aprel kuni «Arsenal»ni qabul qiladi. Mart oyida «shaharliklar» Liga Kubogi finalida «kanonirlar»ni 2:0 hisobida mag‘lub etgan edi.