«Barselona»ning sobiq hujumchisi Tyerri Anri kataloniyaliklarning Chempionlar ligasidan chiqib ketgani haqidagi fikrlari bilan o‘rtoqlashdi. Chorak finalda Xans-Diter Flik jamoasi Madridning «Atletiko» klubiga umumiy 2:3 hisobida (0:2, 2:1) imkoniyatni boy berdi.

«Biz hakamlikni tuni bilan muhokama qilishimiz mumkin, lekin o‘z-o‘zimizni tanqid qilishni ham o‘rganishimiz kerak — jamoada yaxshilanishi lozim bo‘lgan sohalar juda ko‘p va klub ularni hal qilishi shart. Agar hammasi shundayligicha qolsa, biz keyingi o‘n yil davomida ham ayni bir xil muammolarga guvoh bo‘lamiz, bu esa chinakam sharmandalik», — dedi Anri CBS telekanaliga bergan intervyusida.

«Bu jamoa hatto o‘yinni nazorat qilayotgan paytda ham raqiblarga imkoniyat taqdim etadi. Yuqori darajadagi barqarorliksiz elita maqomini saqlab qolishga umid qilib bo‘lmaydi. Buni aytish men uchun og‘riqli, ammo ushbu klubga zudlik bilan yuqori saviyali (elita darajasidagi) markaziy himoyachilar kerak. Bo‘sh hududlarni yopishga imkon beradigan chidamlilik yoki tezliksiz, o‘yinlar haqiqiy dahshatga aylanaveradi. Bu shunchaki birgina omadsiz oqshom emas — bu darhol e’tibor qaratishni talab qiladigan chuqur ildiz otgan tarkibiy muammodir», — deya qo‘shimcha qildi yulduzli sobiq hujumchi.