Yarim himoyachi Enso Fernandes Madridning «Real» klubi qiziqishlari haqidagi xabarlar fonida joriy mavsum yakunida «Chelsi»ni tark etishi mumkin.
Jurnalist Migel Deleynining ma’lumotlariga ko‘ra, «ko‘klar» argentinalik futbolchiga o‘rinbosar sifatida «Bornmut» a’zosi Aleks Skott nomzodini ko‘rib chiqmoqda. London klubi anchadan beri 22 yoshli futbolchining ishtirokini kuzatib kelmoqda. «Olchalar» o‘z yarim himoyachisining sotuvidan 50 million funt sterlingdan ko‘proq mablag‘ ishlab olmoqchi.
Aleks Skott 2023 yilda «Bristol»dan «Bornmut»ga 23 million yevro evaziga o‘tgan edi. Uning amaldagi shartnomasi 2028 yilning 30 iyuniga qadar mo‘ljallangan. Ushbu mavsumda yarim himoyachi barcha turnirlarda 34 ta o‘yin o‘tkazib, 4 ta gol urdi va bitta golli uzatmani amalga oshirdi.
