«Bavariya» vingeri Maykl Olise Chempionlar ligasi chorak finalida Madridning «Real» klubi ustidan qozonilgan g‘alabadan so‘ng OAV vakillari bilan suhbatlashdi.
Vensan Kompani shogirdlari o‘z maydonida kechgan javob bahsida irodali g‘alabani qo‘lga kiritishdi — 4:3. Olise 94-daqiqada uchrashuvdagi so‘nggi gol muallifiga aylandi. Ikki o‘yin natijasiga ko‘ra myunxenliklar 6:4 hisobida zafar quchishdi.
— Turnir qirollari ustidan qozonilgan g‘alabadan keyin taassurotlaringiz qanday? — deya so‘radi jurnalist fransuz futbolchisidan.
— Turnir qirollari? — deb qayta so‘radi Olise kulib.
— «Real» Chempionlar ligasida 15 marta g‘olib chiqqan.
— Ha, tushunarli, — deya javob qaytardi o‘yinchi.
Yarim finalda «Bavariya» musobaqaning amaldagi g‘olibi — «PSJ» bilan to‘qnash keladi.
