Mish-mishlar Joze Mourinyoning Madridning «Real» klubiga qaytishi mumkinligi haqida xabar berishda davom etmoqda. Hozirda «Benfika»da faoliyat yuritayotgan portugaliyalik mutaxassis mavsum yakunida o‘z lavozimini saqlab qolishi dargumon bo‘lgan Alvaro Arbeloaning o‘rnini egallashi mumkin bo‘lgan nomzodlardan biri sifatida ko‘rilmoqda.
Marca nashri xabariga ko‘ra, hozircha «special one» va «qirollik klubi» o‘rtasida hech qanday aloqa bo‘lmagan. Shu bilan birga, manba agar «qaymoqranglilar»dan taklif tushsa, murabbiy Madridga qaytish imkoniyatini ko‘rib chiqishga tayyorligi haqidagi ma’lumotlarni tasdiqlamoqda.
Joze Mourinyo 2010 yildan 2013 yilgacha «Real»da ishlagan. 63 yoshli mutaxassis o‘tgan yilning sentyabr oyidan beri «Benfika»ni boshqarib kelmoqda.
