Миш-мишлар Жозе Моуриньонинг Мадриднинг «Реал» клубига қайтиши мумкинлиги ҳақида хабар беришда давом этмоқда. Ҳозирда «Бенфика»да фаолият юритаётган португалиялик мутахассис мавсум якунида ўз лавозимини сақлаб қолиши даргумон бўлган Альваро Арбелоанинг ўрнини эгаллаши мумкин бўлган номзодлардан бири сифатида кўрилмоқда.
Marca нашри хабарига кўра, ҳозирча «special one» ва «қироллик клуби» ўртасида ҳеч қандай алоқа бўлмаган. Шу билан бирга, манба агар «қаймоқранглилар»дан таклиф тушса, мураббий Мадридга қайтиш имкониятини кўриб чиқишга тайёрлиги ҳақидаги маълумотларни тасдиқламоқда.
Жозе Моуриньо 2010 йилдан 2013 йилгача «Реал»да ишлаган. 63 ёшли мутахассис ўтган йилнинг сентябрь ойидан бери «Бенфика»ни бошқариб келмоқда.
