Kataloniyaning «Barselona» klubi Afrikaning eng iqtidorli yosh futbolchilaridan biri — Mali terma jamoasining 18 yoshli hujumkor yarim himoyachisi Seydu Dembele uchun kurashda «Chelsi»ni ortda qoldirdi. Bu haqda Sports.kz xabar berdi.

Africafoot nashri ma’lumotiga ko‘ra, JMG Academy tarbiyalanuvchisi allaqachon «ko‘k-anorranglilar»ni tanlashga qaror qilgan va yaqin kunlarda hujjatlarni rasmiylashtirish uchun Ispaniyaga yo‘l oladi. Avvalroq malilik futbolchi uchun asosiy da’vogar «Chelsi» hisoblangan va londonliklar u uchun 1,5 million yevro to‘lashga tayyor edi. Shuningdek, avstriyaning «Red Bull Zalsburg» hamda Turkiyaning «Fenerbaxche» klublari ham futbolchiga qiziqish bildirgan.

Seydu Dembele o‘zining nisbatan kichik jismoniy ko‘rsatkichlariga (bo‘yi — 165 sm) qaramasdan, xalqaro maydonda o‘zini yorqin namoyon eta oldi. Uning uchun asosiy tramplin Qatarda bo‘lib o‘tgan U-17 yoshlar o‘rtasidagi jahon chempionati bo‘ldi. Ushbu musobaqada Mali (U-17) safida 5 ta o‘yin o‘tkazib, 2 ta gol urdi va 4 ta golli uzatma berdi. Mutaxassislar ayniqsa uning chap oyog‘i va himoyachilar ortiga kesib o‘tadigan uzatmalar berish mahoratini yuqori baholamoqda.

Shuningdek, Marokashda o‘tgan U-17 yoshlar o‘rtasidagi Afrika millatlar kubogida Dembele 6 ta o‘yinda ishtirok etib, 2 ta gol va 1 ta assist qayd etdi.

Shu tariqa, «Barselona» dunyo bo‘ylab yosh iste’dodlarni jalb etish siyosatini davom ettirib, Mali futbolining eng yorqin vakillaridan birini o‘z safiga qo‘shib olmoqda.